Tgei ei NextGen Surselva?

Tgei ei la missiun da NextGen Surselva?

NextGen Surselva ei in'uniun che reunescha persunalitads giuvnas ord las 15 vischnauncas dalla regiun Surselva. Nossa missiun ei da far ina punt denter la giuventetgna e las persunas politicas per promover in svilup persistent dalla regiun. Nus vulein contribuir da mantener e d'augmentar vinavon la qualitad da viver ella regiun. Nossa finamira a liunga vesta ei d'integrar la giuventetgna els process socials, ella politica ed el svilup regiunal e d'augmentar igl interess dalla giuventetgna persuenter. Aschia vulessan nus contribuir decisivamein a megliurar las perspectivas digl avegnir en Surselva. Nus vulein far frunt alla depopulaziun e s’engaschar activamein per ina Surselva giuvna, empermettenta, intacta ed attractiva.

Co lein nus contonscher nossa missiun?

Nus mettein peisa sin la colligiaziun e la coordinaziun, promovend il brat denter la giuventetgna ed acturs dall'administraziun, dalla politica, dall'economia e dad auters secturs. Nus aspirein da contactar la generaziun giuvna en Surselva sur ils cunfins communals e da promover il dialog davart tematicas socialas, economicas e politicas.

Dialog e collavuraziun cun uniuns localas e regiunalas:

Nus vulein cooperar stretgamein cullas uniuns localas e regiunalas per sentir ils basegns e giavischs, denton tut tenor era per iniziar projects communabels e concentrar resursas. Grazia a quellas cooperaziuns havein nus ina vesta pli vasta sin la regiun.

Collavuraziun cun cumissiuns communalas da giuventetgna:

Nus vulein tgirar ina stretga collavuraziun cun las cumissiuns communalas da giuventetgna, per capir meglier ils basegns ed ils giavischs dil giuvenils ellas vischnauncas e per prender mesiras correspundentas e nezegiar sinergias. Nus elavurein cuminaivlamain soluziuns ed ans engaschain per realisar projects relevants per la giuventetgna.

Collavuraziun cun persunas interessadas:

Nus encurin activamein la collavuraziun cun persunalitads interessadas da differents secturs sco per exempel la formaziun, la cultura, l'economia e la politica. Quels partenadis possibiliteschan a nus da profitar da lur enconuschientschas professiunalas e da lur experientschas e da survegnir novs impuls per nossa lavur.

Collavuraziun cun la Regiun Surselva e cullas vischnauncas:

Nus vulein contonscher ina collavuraziun colleghiala cun la Regiun Surselva e las vischnauncas. Ei duei esser pusseivel da profitar in da l’auter enteifer quellas funcziuns ella grafica cheusut. Plinavon vulein nus evitar activitads che concurrenzeschan las uniuns ni las cumissiuns da giuventetgna communalas. Anzi, nus vulein collavurar per in svilup persistent dalla regiun.

Co essan nus organisai?

NextGen Surselva ei organisada sco uniun politicamain independenta e confessiunalmain neutrala. Denter NextGen Surselva e la Regiun Surselva exista ina cunvegna da prestaziun che ha la finamira da promover la giuventetgna (q.v.d. projects concrets) e da sustener ella cun mieds finanzials. Davart l'utilisaziun dalla contribuziun finanziala decida l'uniun en atgna cumpetenza. 

Next Gen Surselva sebasa silla nova strategia regiunala per il svilup da l'economia locala (rSES) da la regiun Surselva: 

"La Surselva promova la convivenza sociala e sia diversitad culturala. Quei vegn cuntanschiu cun:

• Integraziun da tut las generaziuns, en spezial dalla giuventetgna;

• Persunas da tut las generaziuns ed origins che s'engaschan en Surselva per ina buna convivenza sociala. Quella cultura ei caracterisada d'ina cultura da dialog aviert."

Tgei fa NextGen Surselva concret?

NextGen Surselva…

… pren en ina funcziun consultativa tier las vischnauncas, tier la conferenza da presidentas e presidents e tar la cumissiun regiunala dalla Regiun Surselva sco era en cass da damondas da tiarzas persunas (uniuns, instituziuns e.a.v.). La uniun duei esser in post da consultaziun central per caussas surcommunalas. La consultaziun duei vegnir applicada cunzun en cass da decisiuns che influenzeschan il sectur dalla veta da persunas giuvnas carschidas si en Surselva.

… gioga per gronda part ina rolla colligionta e coordinonta. Sia funcziun cumpeglia la promoziun dil brat d'experientschas denter persunas giuvnas en Surselva sco era cun ulteriuras acturas ed acturs dall'administraziun, dalla politica, dall' economia e dil temps liber. Ella duei survir sco portavusch denter la generaziun giuvna e las purtadras ed ils purtaders da decisiuns sin plaun communal e regiunal: NextGen Surselva sesprova da metter la generaziun giuvna en Surselva en contact intercommunal, da promover il brat davart fatgs socials, economics e politics e da promover in svilup positiv dalla regiun Surselva.

…pren en ina rolla activa en l'intermediaziun da savida e la furmaziun dall'opiniun. Per quei intent po ella iniziar, accumpignar e realisar independentamein projects (p.ex. occurrenzas, luvratoris e.a.v.).

Tgi essan nus?

NextGen Surselva consista da giuvenils e giuvens carschi ord las 15 vischnauncas affiliadas alla Regiun Surselva. Tenor nos statuts ei la finamira che mintga vischnaunca ha da principi il dretg sin 1 - 3 commembras/commembers per garantir ina repartiziun regiunala adequata e legitimada. Premissa per daventar commember da NextGen Surselva ei che las interessentas ed ils interessents ein denter 15 e 30 onns vegls ed han in connex cun la regiun.

Dapli informaziuns davart la suprastonza anflas ti cheu.

Co sas ti sustener nus?

Eis ti denter 15 e 30 onns veglia/vegls ed habiteschas, lavuras ni passentas tiu temps liber/vacanzas savens en Surselva? S'intresseschas ti per fatgs ch'ein actuals en nossas vischnancas ni en l'entira regiun? 

Lu daventa commembra/commember: S’annunziar sas ti cheu. Mintga vischnaunca en Surselva sa delegar ufficialmein 1-3 representantAs alla radunonza annuala da commembers da NextGen Surselva.

Daventa promotur: Sche nies engascha para impurtont a ti e ti lessas sustener noss'uniun cun cussegls, ideas ni cun ina contribuziun finanziala, s'annunzia bugen tier nus. Nus essan engrazieivels per tut ils impuls per saver sesviluppar ed semegliurar vinavon.

Per ulteriuras damondas ni propostas davart l’uniun NextGen Surselva e nossas activitads sas ti bugen contactar a moda nunligionta. Il formular da contact anflas ti cheu.