Suprastonza NextGen Surselva

Funcziun: President

Samuel Zinsli ei carschius si a Valendau ella vischnaunca da Val Stussavgia. El ha absolviu in emprendissadi sco lennari tier la fatschenta Coray a Glion ed ei era vinavon tschentaus en leu. En siu temps liber dat el bugen ballapei ni gioga teater. Aschia ei el commember activ en differentas uniuns. Plinavon semetta el cun grond’ attaschadadad per ils basegns da giuvenils en regiuns muntagnardas: dapi gl'onn 2018 ei el commember activ dalla cumissiun da giuventetgna dalla Val Stussavgia ch'el ha fundau cun. Dapi gl'onn 2019 ei Samuel plinavon representant per il label "Jugendfreundliche Bergdörfer" ella vischnanca da Val Stussavgia che vegn surdaus dall’Associaziun Svizra per regiuns da muntogna(SAB). Dapi il 2023 s’engascha el activamein ella suprastonza naziunala dil forum da giuvenils dalla SAB e po aschia iniziar e promover projects concrets.

Sia motivaziun da contribuir tier NextGen Surselva ei da crear in organ regiunal nua che giuvnas e giuvens dalla regiun san s'entupar per s'engaschar cumineivlamein per ina ferma Surselva. Plinavon vul Samuel unir las experientschas dils representants dallas vischnauncas cun la creativitad nunduvrada dalla giuventetgna. Sia finamira eisi da render la veta en Surselva pli attractiva, aschia che persunas giuvnas tuornan era egl avegnir bugen anavos ella regiun e lessan passentar leu lur veta

Funcziun: vice-presidenta/cassiera

Sarina Caduff ein carschida si a Cumbel en Val Lumnezia nua ch’ella passenta era oz aunc bugen siu temps liber e las fins d’jamna. Suenter la matura al gimnasi claustral a Mustér ha ella absolviu il bachelor en relaziuns internaziunalas all’universitad da s. Gagl. Pil mument eis ella lundervi da serrar giu alla medem’universitad il studi da master en economia sco era la scolaziun supplementara en pedagogia d'economia. Professiunalmein ei Sarina engaschada ella consultaziun d’organisaziuns dil maun public. Tier sia passiun s’auda igl engaschi per sia regiun burgheisa ed en general per regiuns da muntogna. Aschia eis ella denter auter presidenta dil forum da giuventetgna dall’Associaziun Svizra per regiuns da muntogna (SAB) e commembra dalla cumissiun da giuventetgna dalla vischnaunca Lumnezia. Tier ses hobis s’auda sper la politica era da passentar temps cun far sport ni ella natira – cun ir cun skis, a cuorer ni a viagiar.

Sia motivaziun da s’engaschar per NextGen Surselva eis ei da far ina contribuziun alla megliuraziun dallas perspectivas da giuvenils, giuvens carschi e giuvnas famiglias ella regiun Surselva. Per quei intent less ella concret semetter en per differentas tematicas sco per exempel pil manteniment e svilup dil service public, per purschidas attractivas dalla mobilitad e dil temps liber, per ina purschida variabla da plazzas da luvras, eav.

.

Funcziun: actuara

Chiara Weishaupt ei carschida si a Degen en Val Lumnezia e passenta aunc adina mintga minuta libra leu. Suenter la scola media specialisada cun orientaziun sanadad a Glion ha ella midau al gimnasi a Cuera.

Ella s'engascha activamein ella vischnanca ed ella regiun. Ella ei cuninizianta ed actualmein commembra dalla cumissiun da giuventetgna Lumnezia e presidenta dalla Uniun da giuventetgna da Degen.

Ina gronda passiun dad ella ei il tir da sport ellas disciplinas olimpicas 10m buis d’ aria e 50m caliber pign (3 posiziuns). Ella es dapi 11 ons commembra activa dall'uniun Voluntaria Trun e Tiradurs sportivs Surin e commembra el cader da promoziun cantunal. Cun 18 onns ha ella fatg la scolaziun da trenadra e tranescha uss ils giuvens ell’uniun. Sche Chiara ei buc gest d’anflar sil stan da tir, sesanfla ella gl'unviern savens silla loipa da cuorsa liunga e la stad ella muntogna, seigi quei cun viandar ni reiver. Dapi buc schi ditg eis ella era activa ell'uniun da teater.

Tier NextGen Surselva eis ella dalla partida perquei ch'ella less gidar a formar la regiun Surselva e contribuir aschia a crear in avegnir attractiv per la glieud giuvna en Surselva. Ella peglia bugen sezza enta maun caussas e metta entuorn quella e s'engascha aschia per gl'avegnir da giuvens carschi ella regiun. Igl ei era impurtont per ella da colligiar ils giuvens carschi en quella regiun ch'ei pertuccada fetg dalla depopulaziun per crear communablamein sinergias e sligiaziuns persistentas.